【李锦记踩过界】 HeHa Dao 智能手环卖$999【李锦

穿戴式智能装置大热，各大厂商争相推出，今次见到有新嘅智能手环推出，以为又係边间科技巨头，点知睇真啲……原来是李锦记！？

呢只名叫 HeHa Dao 嘅智能手环，由李锦记健康产品集团旗下子公司爽乐健康科技有限公司生产，具备 16mm LED 屏幕，都有齐睡眠监测、步行记录、卡路里计算、10 米防水、时间显示等基本功能。手环连接官方 App 就可以一站式实时记录及分析所有健康数据，亦可以建立群组，同朋友分享数据，睇下大家每日跑咗几远，整个步行排行榜斗一斗，或者即时分享威水史上各大社交媒体，又几啱依家潮兴跑步嘅运动子。手环支援 iOS 7 或 Android 4.3 以上装置，充电时间1小时，待机时间可长达 5 天。

HeHa Dao 智能手环现已有售，备浅灰、黄、蓝、紫、黑五色，售港币 $999，比小米手环足足贵 10 倍，唔知迟下会唔会搞推广活动买手环送豉油呢？（狂想Mode）