【自助餐放蛇卧底组】$200有找 韩菜料理 放题

韩烧同日本菜 放题 你就食得多，有埋韩国料理嘅 放题 你又食过未？呢间以韩星画像作装饰的餐厅在装修方面也花过心思，枱与枱之间有一定的空间，设有卡位和VIP房。可供选择的韩日料理超过十款、烧肉和海鲜种类超过三十款！到底味道係点呢？等我试下先！

 

订了枱也要等到2046

打电话订枱时店员表示即使来到也要等，但没想过仍然要再等多一小时（请问订枱的意义何在？），餐厅的时间管理要尽快改善。细心的经理知道顾客等了很久，会提供冰冻嘢饮。

 

刺身望落新鲜 食落无味

除了点了的刺身外，餐厅会额外送每位客人一只手咁长嘅鲜虾刺身。刺身数量也来得很足，卖相也很吸引，望落肥美又新鲜。食落口感不错几juicy，温度适中，不过就无味，有点失望。

 

寿司的名字几有创意，如：黑蚊蚊、笑虾虾、碎湿湿。卖相不俗，绝对不像其他 放题 般求其将旧饭堆埋一齐咁。不过，夹起寿司时发现其实件寿司都几散。

 

食 放题 竟然有人蔘鸡汤？！仲唔即刻挑战下？嗰碗汤，啊唔係，个汤碗好大，但汤就唔係好多，只係一人份，如果想食就要一人叫一碗。足唔足料呢？记者见到有几条人蔘鬚鬚（应该係），同鸡皮一块。可能厨师以为我唔锺意食汤渣，所以足唔足料就见仁见智。味道方面就一般般啦，普通鸡汤味，无人蔘味的。

牛肉粉丝辣汤内有很多牛肉，而且口感鲜嫩不黐牙。汤的味道像罗宋汤，又够晒热，不是很辣。呢个可以添食！

酱油虾的卖相有点似泰国的生虾刺身，虾的味道被大蒜和酱油盖过，完全食不到虾味，而且酱油很鹹，疑似中伏！

 

韩国料理又点少得年糕呢？呢到用卡邦尼酱炒年糕，味道几香几creamy，之但係我係叫年糕喎，唔係肠粉，个年糕腍到似肠粉，口感很差，中大伏！

炸物不是用了很多炸粉，而且热辣辣，抵讚！但係个炸虾天妇罗冇咩虾味喎。

呢到有得烧肉同海鲜，有肥牛、牛舌、一口牛粒、羊架、五花腩、帆立贝、生蚝乜乜乜。虽然刺身同料理用嘅海鲜无咩味，但係烧烤用的海鲜却是另一回事。帆立贝同生蚝绝对是回本首选！够大只又鲜味，要追加再追加！唯一不好的是蒜香粉丝烤生蚝没有粉丝（疑似违反商品説明条例喎）。醉翁之意不在酒，精明的你又点会因为冇粉丝而嬲呢？

另外，要有心理準备呢到通风系统麻麻，劲大烟，攻到记者标晒眼水，食完成身烧肉味。

除了雀巢雪糕同雪米糍任食外，餐厅都有自创甜品。甜品的设计是时尚简约风，均是以白色为主色，中间配以一点（只是一点）朱古力酱作装饰。贴士：都係主攻雀巢雪糕同雪米糍吧！

 

总分：6／10

伏，係无处不在，但烧肉同烧海鲜都不错，可以回本，建议你把胃口留给烧烤。刺身、寿司同韩日料理的味道有很大的改善空间。但呢个价钱，都算係咁啦！

韩日屋

地址: 旺角兆万中心15楼

供应时段: 5pm –1:00am

订座电话: 2989 9433

收费:

成人 $139–$169 小童(1米－1.4米) $99 (星期日至四)

*成人加$30，小童加$10 可享刺身任食

星期五、六、公众假期及前夕每位加$10