【自助餐放蛇起底组】$128 中环茶记放题 鸡髀什扒任食

放题 其实无罪！只要食几多才叫几多，便不会浪费。最近上环有间新茶记都捞埋 放题，大人$128，八岁以下小朋友就＄68，1.5小时任锯 铁板 牛扒，捞丁、焗饭、中式点心、蒸饭任食，仲有任饮啤酒咖啡奶茶，食物仲标榜唔落味精，用本地靓料居多，咁好唔好食？睇完试食报告，你就知!

超过30款任食选择

餐牌数埋数埋，唔计饮品，总共有超过30款，西式有齐意粉、焗饭、铁板 扒、沙律；中式则有点心、盅饭等。但係餐牌上仲有少少规则须要留意，例如每位客人一次只可柯打三款食物，饮品则不限，另外为了避免浪费，客人需要吃完一轮食物，才可柯打第二轮。所以限时90分钟，其实不算太多，要好好把握！

前菜小食！首选点心

食放题冇理由，一开波就食粉麵饭，好在餐厅小食选择颇多，有鸡翼、牛腩、点心、油菜，甚至西多士。笔者食过之后，觉得最有水準都是点心，每一款都是新鲜蒸製，用料和味道都拍得住大酒楼和市面上的某些点心连锁店，茶记有此质素，好难得！

烧卖、虾饺、牛肉、叉烧包等基本款式都齐。笔者试了山竹牛肉和鹌鹑蛋烧卖；牛肉形状唔会圆碌碌似牛丸，应该是厨房自己造，食落肉质软嫩，亦加了芫荽、马蹄，不错！至于，唔係周围有得食的鹌鹑蛋烧卖，就有虾、有肥猪肉，加埋原粒鹌鹑蛋，虽然胆固醇超标，不过食落确係甘香丰腴，让人食不停口！

 

好食还好食　主菜太大份

食完小食，轮到主菜，餐厅上主菜大部份都是粉麵饭为主，由一般西式焗饭意粉，到中式盅饭、海南鸡饭都应有尽有，其中最吸引人的莫过于铁板扒餐，每份都是用热辣辣，吱吱声的铁板上，回本必试！

哇！真係好丰富！估唔到任食什扒都咁足料，有齐厨师肠、薄牛扒、猪扒、鸡扒、薯菜，虽然都是大路茶餐厅货色，但是件件都好大块，鸡扒连皮、猪扒有骨，配着黑椒汁食，亦冇雪味，过得去啦！

餐牌上面有大路野，亦都有特别的怀旧菜，好似这个 鸡髀 头抽捞丁，餐厅不惜工本用本地九龙酱园出品，比市面上同类出品贵同靓，连陆羽此等高级酒楼都用，手掌咁大，又厚肉的 鸡髀 ，腌得全只黑漆漆，有光泽，食落又甜甜地，唔会太鹹；丁麵除咗用头抽捞，食得出仲落咗葱油，加上又煮得够爽，可以Encore!

除咗港式西餐之外，主菜都有盅饭等中式选择。饭盅设计亦相当贴心，有上下两层，上层是係餸，下层係饭。蒸煮时上层的肉汁精华会从特製的小气孔滴落到下层的 蒸饭中。比起传统的盅饭更为整洁，唔会令饭粒过鹹。另外，餸菜其实都几靓，好似腊肠用的是元朗自设大工场的荣华腊肠，食落甘香，宁舍不同！

不过，主菜略嫌真係太大份，而且唔可以减份量，我同摄记食左三个主菜，真係唔洗再食其他嘢！好彩笔者试食当天冇食晏，仲可以食返个甜品翻本！

甜品选择偏少

老实讲，甜品就选择唔多，得双球雪糕及是日中式糖水。不过，你去茶记都唔会期望将甜品当饭食吧?

 

总结：

笔者本来对茶记放题，冇咩期望，点知感觉其实几OK!每人$128，兼无加一，其实今时今日去咩翠Ｘ、太Ｘ要食餐饱饭，要有齐前菜、主菜、甜品，埋单都唔止呢个价，加上餐厅仲要任食任饮。食物质素亦好唔错，尤其是头抽 鸡髀 捞丁、点心、蒸饭等中式出品，都算係平实好味的心机作。唯一问题是主菜实在太过大份，每人叫一份都已经半饱，好似想尽快塞饱你咁，试唔到太多款！不过整体而言，其实都值７分，行开行埋可以一试啦！

总分: 7/10分

 

香江冰室

地址: 中环 荷李活道15号地下 (显示地图)

营业时间: 星期一至日8am–12mn

放题时段:6pm-7:30pm; 7:45pm-9:15pm;9:30pm-11pm

放题收费: 成人$128/位 8岁以下小童: $68/位

查询: 2806 0220

备注: 收信用卡，不收加一

 

延伸阅读:

圣诞平食自助餐！$400有找宵夜Buffet

马六甲西米食谱@JACKY YU