【自助餐放蛇起底组】高分！亚洲50最佳餐厅 $238泰式半

平时见我哋放蛇专员係咁食自助餐，你哋係咪心郁郁想食埋一份呢？今次我哋请到两位《新假期》民间食神 (其实係本刊忠实读者) 同我哋一齐放蛇，目标係亚洲50最佳餐厅嘅泰菜餐厅 Issaya！呢间位于铜锣湾的餐厅，平日叫个 Main course 已经已要$2xx，最近竟然全球首次推出$238起嘅半自助餐，价钱包一个主菜，前菜和甜品可以无限任食，食足3个钟，究竟质素如何？立即交俾食神品评下！去片！

头盘甜品任食　主菜6选1

半自助午餐由12点开始，可以慢慢歎到3点，头盘同甜品可以出去自助餐枱任拎，而主菜就6选1，价钱由$238-$350，视乎主菜而定。一坐低，店员就送咗一杯餐前饮品，可以拣荔枝乌龙茶或芒果黑茶，食神试咗荔枝乌龙茶，好够荔枝味，不过就甜咗少少，最好再茶入面嘅冰融咗少少，沟淡少少饮会好啲。

首先睇下头盘，头盘好多都係沙律，不过款式都几多，唔係一味食菜，有香蕉花伴棕榈芯沙律、青木瓜海鲜沙律同泰式酸汁三文鱼沙律，仲有香辣醋汁牛柳、脆香辣汁海虾，另外有自家製泰式海鲜汤同磨菇汤。

6选1主菜 带子/牛面颊肉有惊喜

埋单几钱呢？其实就睇主菜而定嘅，咁6选1主菜有咩食呢？分别有3个价钱选择嘅，$238有蜜汁香煎带子配猪腩肉/泰南黄咖喱鸡/黄咖喱杂菜锅，$288有慢煮澳洲炖牛面颊肉/胡椒香草大虎虾，$350有椰香蒸焗龙虾，而每一客主菜都跟一份清迈蘑菇五穀饭，够埋饱肚啦。

6款甜品任食 食神好评俾高分

甜品有6款，有烟燻椰青芝士蛋糕、茉莉花奶冻、桑莓朱古力软芝士蛋糕、桑梅杏仁蛋糕、泰式马卡龙同自家製雪糕，另外仲有4款水果。

泰式马卡龙每日有一款味，放蛇个日係泰式奶茶味！劲罕见！食神黎先生话好够茶味，唔太甜，男仔食都唔觉太甜！可以啪多几粒！桑莓朱古力软芝士蛋糕造型好得意！好似O紧咀嘅甲虫，食落呢，味道酸酸甜甜，配埋曲奇饼底唔太腻。林小姐就试咗烟燻椰青芝士蛋糕，佢觉得芝士好浓味，但同个曲奇饼唔係好夹，而茉莉花奶冻第一啖个味道有啲怪，但食多几啖食真啲又几清新，同埋好滑！自家製雪糕当日係腰果味，有脆米、椰丝等配料自己加，食落腰果味好浓郁，够creamy！

总结：

即係咁，呢间亚洲50最佳餐厅平时剩食个主菜都$2xx啦，今次$238半自助午餐真係卖大包啰，3月仲要有额外85折优惠，好抵，真心好抵！！！选择呢，如果头盘甜品再多啲选择我会更满意，食落呢，八成嘢食都高水準嘅。服务好贴心，店员有问必答，我哋食神话好冻又肯帮佢熄冷气同俾披肩佢，加分！而且环境实在太舒服了，阔落得嚟又多梳化位，而且用晒落地玻璃窗，好开扬！所以今次小编同食神都俾极高分！复活节未谂去边食可以谂谂！

小编总分：8.5/10

食神黎先生: 「二个字，无得输！我俾9分！」

食神林小姐:「总括嚟讲样样都几好，自己俾钱都会返嚟食，我俾9分！」

IssayaSiamese Club Hong Kong

地址：铜锣湾登龙街1号金朝阳中心二期25楼全层(显示地图)

电话：2154 3048

半自助午餐供应时间: 星期一至日 12nn-3pm

收费: $238-$350 (视乎主菜选择而定)

用餐时间:3小时

备注:收加一，三月份可享八五折优惠

延伸阅读:

【自助餐放蛇起底组】Asahi+梅酒任饮! $188周末蒸锅刺身放题

【自助餐放蛇起底组】MK日式放题 3小时有铁板烧食