【自助餐放蛇起底组】$159 鸡煲 ＋火锅＋刺身通通任食！

我哋5点半嚟到，用$129就可以食到鸡煲火锅放题，加多$30有埋任食刺身！先食刺身，然后再食鸡煲再打边炉！如果食完鸡煲打边炉想转汤底就要每位另加$30，如果唔转汤底就直接食完鸡煲加清汤！2个钟食到捧住个肚咁走！

刺身摆盘、色泽靓 唯冰感较重

加多$30就可以任食埋刺身，当然要试啦。刺身选择都唔少，有油甘鱼、三文鱼、甜虾等。一上枱刺身摆盘唔马虎，有冰係底之余仲有灯，睇落刺身色泽相当唔错。整体刺身食落冰感较重，但呢个价食到呢种刺身，真係够哂有凸。

鸡煲份量够哂多 香料味略嫌不足

食完刺身就嗌咗个鸡煲食，鸡煲嚟到嘅时候已经有8成熟，所以煮多阵就已经可以食。一打开鸡煲芫茜嘅味道好出，望落鸡嘅份量相当多而且每件鸡Size平均唔会过大。鸡食落肉质算唔错，但就係唔够香料嘅味，唔够丰富。

火锅酱料配料选择多 加钱先可以转汤底

食完鸡煲直接加清汤打边炉，事关转汤底係要每人加多$30！喺火锅配料方面，选择都算几多，净係肉类同海鲜都已经十几廿样，再加埋啲丸、饺子、蔬菜、麵等等，一大版纸任拣。酱料出面自己调配，都有十几种酱料可以拣，相当唔错。

鸡煲汤底影响食材味道 丸类品质唔错

汤底唔加$30转原来影响可以好大，鸡煲汤底味同大部分食材都唔係好夹，食落真心怪怪地。丸类方面选择够哂多，而且食落质素唔错，特别係贡丸同麻吉丸，有惊喜。

海鲜任叫任食 海中虾正 其他就唔太新鲜

海鲜係任食，仲有「是日海鲜」，日日唔同，我哋食果日嘅是日海鲜係象拔蚌BB，任食都算几吸引！虽然呢度嘅海鲜係任食，但食落嘅质素真心麻麻，唔太新鲜，贝壳类嘅更加係洗得唔够乾净。

饮品选择多唔过甜 仲有荔枝味雪米糍食

呢间嘅饮品同甜品都係出去自己拎嘅，有两个雪柜嘅饮品可以选择，试咗其中嘅支装饮品，唔太甜又清热。甜品有雪糕同雪米糍拣。

总结：价钱相当平，百几蚊就可以任食鸡煲、火锅、刺身，喺选择方面不论火锅配料定酱料、刺身都非常多，刺身算几新鲜就係冰感太重；鸡煲份量够但香料不足；若果火锅唔加钱转汤底，鸡煲味同火锅唔係太夹味道会有啲怪，海鲜亦唔够新鲜乾净，反而其他火锅配料好似丸类就唔错，上菜速度都够快。环境方面，如果唔係坐卡位坐中间的话会较逼。

总分：6.5/10

壹火锅

电话：2780 8399

地址：旺角西洋菜街1号兆万中心16楼

$159放题时段：入座时间5.30pm – 6pm

用餐时间：入座起计2小时（11pm后入座任食3小时）

备注：收加一