【自助餐放蛇起底组】Asahi+梅酒任饮! $188周末蒸锅

蒸气锅等足16分钟　海鲜带腥肉质差

放题总係分唔同入座时段划分价钱，今次2小时放题由5:30入座，讲明食到7:30就要交枱，食物上得慢啲，都食得赶赶哋。点知入座后，个蒸气锅等咗16分钟先上枱。

落单都係剔纸仔，一本过揭哂前菜、刺身、夀司及天妇罗等等食物，而蒸气锅就有另一张纸填，牛肉及鸡肉等基本肉类，而海鲜就有帆立贝及蚬，蔬菜就有小棠菜、鲜冬菇及南瓜。

肉类来到见到个样都知唔多对路，牛肉一夹，一片厚、一片薄到烂咗，猪肉唔係猪腩片，真係猪肉片，得鸡肉个样最对路。蒸完出来，结果符合外观推测，牛肉、猪肉都係坚嚡口。Sorry，我真係食唔落，吞唔到。

帆立贝及蚬都係好细只，自己去街市买，应该都会大只过佢，睇落都唔係新鲜货。果然，食落係有阵腥味。唔……落番提供韩式辣酱及蒜蓉等，每样加啲味，都应放入到口，但标榜日式蒸气锅呢，感觉韩风多啲，还是沾芥末吧。

刺身寿司新鲜　但说好的鹅肝呢？

刺身都算正路，来得啱数又快手，三文鱼厚切又肥美，油甘鱼脂肪分布得ok，但雕鱼就无咩味，腥腥哋。甜虾虾壳黐住啲虾肉，带子size唔大，但成只完整，无再悭皮薄切，食落都甜美，算係咁啦。

受欢迎嘅吞拿鱼无得拣刺身，净係可以叫寿司，不过见到真身时，睇来师傅刀功麻麻哋，切到啲肉好霉。其他卷物算係符合图片说明，要芒果有芒果，要芝士有芝士，但最期待的鹅肝带子卷，说好的鹅肝呢？一定係消失于无形之中，卷中只剩孤独的青瓜。

串烧店开到成行成市就知道好受欢迎，放题必食之一，点知又失望了。牛舌用盐、黑椒调味，但肉质嚡，肉汁少。猪腩片，谂住有猪腩肥位无死错人，点知瘦肉位嚡到起渣。以为鸡翼实无死啦？点知都係dry。得烧虾比较可取，烧得个壳脆卜卜，但肉质都係烧过火。

转战海鲜类，烧蚝望落调味重手，壳大蚝肉细，少少腥，调味救番。烧帆立贝重口味，食落味道正常，但竟然有沙。

超值回本　任饮酒精饮品

最回本係任饮啤酒、清酒及梅酒，啤酒仲要坚係Asahi，唔係杂牌啤酒。超市买六罐都要近$50，出街饮更无几十蚊都饮唔到，饮多两罐，再包埋食一餐，都算几抵。清酒及梅酒都无伏，清酒衬刺身、寿司一流，梅酒偏甜，啱哂丝打，怕醉仲可以加冰饮。唔饮酒？饮品选择都几多，连果汁先生都有，仲有清热饮品，食完天妇罗、串烧饮够下火。

失望！雪糕得雀巢芝麻味及云呢拿味

有啲放题都会有靓牌雪糕食，但限一人食一个，呢度就得雀巢，唯有当回忆童年味道啦。好在有雪米糍食，无咁失望。其他甜品仲有奶冻同日式果冻，个样都唔日式，似港式杂果啫喱，味道与想像都一样，甜甜哋，无惊喜。

总结：环境方面，梳化位及卡位多，旺区来讲算阔落，但蒸气锅佔枱面唔少空间，不时无位放食物。食物算快手上枱，但串烧太乾身，上枱已唔够热，蒸气锅食材又唔新鲜，係得刺身、寿司及天妇罗唔错。胜在有酒精饮品任饮，酒鬼饮多几罐都抵番，不过明明限时两个钟，但侍应在半个钟前，已经来收钱同last order，要扣分。

总分：6.5/10

筑地番本日式放题

地址: 旺角通菜街1A-J号威达商业大厦Deli 2 一楼B室(显示地图)

电话：2336 8350

$188晚市放题供应时间: 星期六及日:5:30pm-7:30pm

收费: 成人:$188

备注:收加一

延伸阅读:

【18区扫食】太子直击 爆膏蟹皇饭+肥厚菜甫蛋pizza

|18区扫食|深水埗8大惹味店 芝士鸡髀保龄球