【自助餐放蛇起底组】MK日式放题 3小时有铁板烧食

刺身2分钟上枱　虾肉超霉一食即吐

呢间放题其实分咗好多个入座时段，3小时任食放题要由5:30入座，食到8:30，闲日最平都喺$228，价钱同坊间差唔多！一入座，店员已经通知我哋今日无吞拿鱼，饮品、甜品可以出去自助区自己拎。

落单同平时放题一样都係剔纸仔，一共有两本落单簿仔，一本喺写刺身、寿司同卷物，另一本落铁板烧、炸物等。落单嗰阵，店员已经话佢哋上菜会好快手，所以可以边落边等。果然落咗单后，大约两分钟刺身就已经上枱！真心劲快手，而且执啱数，抵讚。

不过呢，除咗三文鱼厚切又新鲜外，其他味道就认真……超麻麻！将本身已经唔係厚的带子开边，薄到无晒口感；章红鱼刺身口感似香口胶，咬极都唔断；甜虾同赤虾食落只有微微虾味，而且肉质完全唔ok，越食越霉，吞都吞唔落，即刻吐返出嚟。

呢度除咗正常寿司外，仲有好多好有创意嘅mix & match寿司，例如有黑松露牡丹虾同泰式生虾寿司，好新奇！黑松露牡丹虾一食落超浓黑松露味爆出嚟，虾肉正常，而且寿司饭够细，食几应该都唔会太饱肚。另外泰式生虾太有趣了，味道同真嘅泰式生虾一样，只虾唔霉，可以一试。

另外仲有一啲创作寿司，都係将啲鱼类、海鲜类嘅食材mix & match，御寿司喺芒果＋甜虾＋蟹籽，一食落口有好清新嘅芒果味，但芒果味过后就食到霉虾味……软壳蟹手卷睇图觉得软壳蟹爆出嚟，好兴奋忍唔住即刻叫一个试下，点知现实总是残酷的……软壳蟹短到…….得个半截脚仔……食落好香脆……但应该要叫十份先满足啰。

炸物锅物出色　铁板烧冻冰冰

放题唔少得嘅炸物，唔错唔错，全部热辣辣，芝麻鸡翼超香口，好食！自家製吉列炸蚝都得过，一入口蚝汁即标出嚟，估佢唔到！紫心香芋球有啲淡味，但都炸得脆卜卜，过关啦！但最惊喜都喺个榴槤炸弹，榴槤馅超饱满，一咬即刻感受到嗰种臭味！好正！

另外锅物都正正常常，最估唔到呢度有鸡煲食！鸡件都几大件，唔韧，入口少少辣，但麻度十足，可以一试。

最期待嘅铁板烧！但一上枱，点解咁颓嘅 卖相好求其，唔係好吸引，铁板大虾只虾无出事，但可以再弹牙啲，但个汁有啲好怪嘅酸味，令人无意欲再食第二只！铁板酱汁鱿鱼筒照旧都係颓，唔讲都知喺铁板出炉……食落都唔热嘅，好似放咗好耐先上枱咁，就算弹牙又有咩用喎！盐烧牛舌等咗半个钟先到，同埋我Order 2 份，嚟得1份，食落牛舌好软腍，好食，但唔想再等多半钟！

自助甜品柜加分　1人1盒Mövenpick

甜品区係自助形式，有粟米羹、花生糊热食，仲有朱古力喷泉同泡芙任拎，仲有少少冷盘，有冻虾、菜同生果等。另一边仲有两大个甜品柜，可以细细件mousse cake同点心等。

总结：甜品区+Mövenpick雪糕好吸引，炸物跟锅物不错，但刺身同铁板烧味道麻麻，真係有待改善，要扣分！虽然有半个钟头都係等嘢食到，但胜在有甜品自助区域，唔介意可以出去拎甜品医下肚先啰。但服务都唔错嘅，几乎一举单就俾店员抢走咗，好快手，环境都好多卡座，够阔落，而且平时日式放题食两个钟都同呢度差唔多价钱，呢度可以坐3粒钟，啱晒慢慢食嘅朋友！

总分：7/10

御满屋日本料理

地址: 旺角弥敦道655号1楼全层 (显示地图)

电话：3622 3336/3622 3338

$228晚市放题供应时间:

星期一至三:5:30pm-8:30pm

收费: 成人:$228，小童:$148

备注:收加一