【自助餐放蛇起底组】买一送一 $99五星酒店Tea Buff

平时想食个下午茶自助餐，埋单起码$200一位，最近竟然发现，铜锣湾这个酒店Tea Buffet，价钱只需$198，仲要买一送一，除开即係每人$99（未连加一）！听落真係激抵，但质素点先？等小编搵埋同事，一齐潜入去试食。

虽然这个$198的二人同行优惠价只适用于星期一至五，但试食当日所见，非常爆场，职员仲话Booking已满，有部份想walk-in的客人都要失望而回。而且有不少食客都是拎住「食饭袋」的上班族，绝对有理由相信佢哋係无食lunch，留肚进击这个下午茶自助餐！

即睇有咩食！

自助餐区域都算大，两张大长檯，再加一个长吧檯位，非常企理。食物款式都算多，有轻食类的Salad Bar、手指三文治，还有新鲜烘热的欧陆包点，例如小牛角包、绿茶红豆酥卷等。要饱肚的，都有即蒸的点心、伊麵、荷叶饭、少量西式意粉、薄饼等。当中点心的款式都算多，虾饺、奶皇包、蒸粟米，就连烧卖都有分牛肉和猪肉两种，卖相都唔差。

试食之前，小编首先想讚一讚自助餐碟的设计，除了大小、颜色不同的圆碟，还有这款九格碟，正好可以将食物分开，避免沾上其他食物的汁酱及味道，砌得靓嘅话仲可以影相呃下Like，几好玩。

好！真。试食时间！热食方面总算不错，点心够热辣辣，奶皇包馅料颇多，略嫌欠缺了蛋黄香，亦都无流沙效果，但总算香甜软滑；牛肉烧卖啖啖肉，有少少牛肉羶香，同事就唔太喜欢，不过牛魔王小编又觉得几好味。虾饺方面，皮就太厚，食落粉皮多过虾肉，如果可以改善埋就最Perfect。荷叶饭都好足料，够乾身之余，仲有大大粒虾乾，有嚼劲；西式Pasta酱汁的调味都恰到好处，总括而言都几满意。

食食下发现自助餐区排长龙，原来係即叫即煮的港式车仔麵档，自助餐算少见喎！麵底有油麵、粗麵、幼麵、河粉、公仔麵；汤底都分猪骨汤和清鸡汤；最后拣埋餸菜配料，真係好似车仔麵档咁一格格，由上至下，左至加整齐咁排列好，款式仲够晒正宗地道，五香牛腩、猪皮、鱼蛋、萝蔔、鱿鱼、豆卜、冬菇、菜类，最重要係连猪大肠都有得食！你喺 自助餐 几时有见过呢啲街坊粗菜先？真係要讚这间酒店够大胆创新。配料仲要任选！小编太为食，嗌下嗌下足足拣咗成五、六款餸，平时出去麵档食，最多都係三餸，而且仲要任食任拣，抵食又好玩。

味道方面都唔差，表现中规中矩，零中伏。小编选的猪骨汤底不会过鹹，接近乳白色，饮落顺喉，亦无味精口渴感，有香醇的猪骨肉香。麵底的煮製时间掌握得好好，即使排晒长龙，师傅密密手煮麵、夹餸，煮出来的麵质依然弹牙，唔会过腍。配料必食五香牛腩同猪大肠！前者焖煮得够软嫩鬆化，入口即溶，伴带牛脂香气，劲有车仔麵风味；后者同样软滑入味，而且清洁得很乾净，完全无猪羶味，内里的肥膏脂肪唔算多，女仔食咗都唔怕肥。冬菇的菇香好突出，如果可以多返啲蚝油味就更好；鱼蛋都算大粒，有微微咖哩辣味；萝蔔都清甜无渣。这个车仔麵拍得住街边档，够怀旧够本土，用来作为整个 自助餐 的医肚环节，饱肚又满足。

填饱咗正餐个胃，甜品胃又呼唤我出去搵食。有齐冷、热款式，小编就最锺意Apple Crumble，苹果够大粒，质感介乎腍身同爽口之间，肉桂味很浓郁芳香，面层的脆粒亦带丰富牛油香，酥脆美味，暖笠笠很香甜。另外仲有各式芝士蛋糕，包括美国芝士蛋糕、蓝莓芝士饼、海盐焦糖芝士蛋糕，以及Tiramisu等，其中Tiramisu最好味，咖啡香、酒香兼偏，芝士慕斯口感轻软，伴带湿润蛋糕，甜度适中，颇有层次。泡芙大粒又鬆软，内里的咖啡忌廉颇多，质感幼滑，好食。海盐焦糖芝士蛋糕就略为失色，面层并不是焦糖脆，而是啫喱状，食落亦感觉不到焦糖香，而且会和芝士蛋糕分离，层次顿失，扣咗少少分。但总括黎讲，这一round甜品都食得开心，属于酒店 自助餐 级数的靓甜品，女仔实啱！

总结：7.5 / 10

今次这个 自助餐 总算好满意，食物的种类都算多，由轻食的Salad Bar到饱肚的热食类、甜品都有齐，款式多样之余亦特别，未食之前行一转都觉得满意，食得过。尤其最锺意Live Station的怀旧港式车仔麵，有惊喜，够风味。食物质素都算高，爆场令大厨和职员Refill更快，食物更新鲜，某些食物略有缺点是 自助餐 少不免的，但大致上都不错，味道良好，会想再食的。而且$198买一送一的价钱是超抵食之选，大家不妨Lunch hour捱多阵肚饿，到3pm在这里来个下午茶all you can eat，值得一试！

Kudos

地址：铜锣湾礼顿道8号香港铜锣湾皇冠假日酒店1楼 (显示地图)

电话：3980 3000

下午茶自助餐供应时间:

星期一至五 3pm – 5pm

收费:

[由即日至4月4日]

优惠价 $198/位（可享买一送一优惠）大小同价

[4月5日起]

优惠价 $238（可享买一送一优惠）大小同价

备注: 收加一、收信用卡